][ اذوق القهر من ربعي وناسي ][

انا من وين ما وجّهت راسي
............. لقيت الحظ هو والوقت قاسي
تواجهني الصعاب فكل ساعه
............. واذوق القهر من ربعي وناسي
وياكم شفت ف الدنيا هوايل
............. وياكم جات بهموم ومآسي
ولا لاقيت من هو للثقيله
............. يخففها ولا من هو يواسي
عظيم الشان ياربي دعيتك
............. تعين اللي دعاك لكل باسي
كريم وما يخيب اللي لجا لك
............. بتالي الليل والعالم نعاسي
وانا وجهت وجهي لك وقلبي
............ قفا ما زاد ف الوقت انتكاسي
دعيتك ف الرخا وفكل شدّه
............ دعا الاخلاص مافيه التباسي
بحق اللي بعثته للخلايق
............ يوجّهم إلى خير المراسي
ترد الكيد للي كاد فينا
............ معنينا على لعب الكراسي!
تجازيه بفعاله وانت قادر
............ وجنبنا عن الناس الدناسي
على بابك ولا ينصّك بابك
............ جعلت الصبر ف الشده لباسي
رفعت الراس وكفوف الضراعه
............ انا المظلوم.. ياربي تواسي
كذا الايام.. جل اللي قضاها
............. وسيرها على خير القياسي
رضينا به وبالشي المقدّر
............ ومن يضجر غدا صاغر وخاسي!
عسى يرجع لنا اللي غاب عنا
............. عقب ما صار متغيّر وناسي
نعم من يوم ما الدنيا غدت به
.............. وحنا لا وصال ولا تآسي
انا حسبي على من صار دونه
.............. وكنه ف العداوه ذو نواسي!
سعى فينا بغيبه او نميمه
............. يحسب إنه بتفكيره سياسي
نسى يوم الحساب وما درى به
............ نهار العرض واشخاصن تداسي!
وسالك يا الاهي بالسماحه
............ وبالتوفيق دايم والحماسي
وصلى الله على الهادي محمد
............ شفيع لأمته في يوم قاسي

منقول لعيونكم

مررة عجبتني القصيدة .. مشكورة وتسلم ايدش عالنقل الحلو

الله يسلمك